ಭೂಗತ ಪಾತಕಿ ಬನ್ನಂಜೆಗೆ ಮುಳುವಾದ ದುಬೈ ಫೋನ್ ಕರೆ

0
533

ಈ ವರದಿಯ ಬಗ್ಗೆ ನಿಮ್ಮ ಅನಿಸಿಕೆ ತಿಳಿಸಿ.
ಶಭಾಷ್ (0) ಸಮ್ಮತ (0) ಅಸಮ್ಮತ (0) ಖಂಡಿಸುವೆ (0) ಅಭಿಪ್ರಾಯವಿಲ್ಲ (0)

13-02-2015-16

‘ಕುಮಾರ ರಾಜ ಹೇಮಂತ ಹೆಗ್ಡೆ’ ಇದು ಬನ್ನಂಜೆ ರಾಜನ ಹೊಸ ಹೆಸರು. ಈ ಹೆಸರಿನ ಪಾಸ್‌ಪೋರ್ಟ್‌ನಲ್ಲಿ ಆಫ್ರಿಕಾಗೆ ತೆರಳುತ್ತಿದ್ದ ಬನ್ನಂಜೆಯನ್ನು ಮೊರೊಕ್ಕೋದ ಕಾಸಾಬ್ಲಾಂಕಾ ನಗರದಲ್ಲಿ ತಡೆದು ನಿಲ್ಲಿಸಿದ ‘ರಾ’ ಅಧಿಕಾರಿಗಳಲ್ಲಿ ಕರ್ನಾಟಕ ಮೂಲದ ಒಬ್ಬ ಮಹಿಳಾ ಅಧಿಕಾರಿಯೂ ಇದ್ದರು. ತನ್ನನ್ನು ಬಂಧಿಸಿದ್ದು ‘ರಾ’ ಅಧಿಕಾರಿಗಳು ಎಂದು ಗೊತ್ತಾದ ತಕ್ಷಣ ತನ್ನ ಭೂಗತ ಆಟಕ್ಕೆ ಪೂರ್ಣವಿರಾಮ ಬಿತ್ತು ಎನ್ನುವುದು ಬನ್ನಂಜೆ ರಾಜನಿಗೂ ಖಚಿತವಾಗಿದೆ.

ಫಾರ‌್ಚೂನ್ ಗ್ರೂಪ್ ಆಫ್ ಹೋಟೆಲ್‌ನ ಮಾಲೀಕರಲ್ಲಿ ಒಬ್ಬರಾದ ಹೊಕ್ವಾಡಿ ಪ್ರವೀಣ್ ಶೆಟ್ಟಿ ಅವರಿಗೆ ಬೆದರಿಕೆ ಕರೆ ಮಾಡಿ 5 ಕೋಟಿ ರೂ. ಹಣಕ್ಕೆ ಬೇಡಿಕೆ ಇಟ್ಟಿದ್ದು ಬನ್ನಂಜೆಗೆ ಬಂಧನಕ್ಕೆ ದಾರಿಯಾಗಿದೆ.

ದುಬೈನಲ್ಲೂ ಹೋಟೆಲ್ ಉದ್ದಿಮೆ ನಡೆಸುತ್ತಾ ಅಲ್ಲಿನ ಪೊಲೀಸ್ ಜತೆಗೂ ಆತ್ಮೀಯ ಸಂಬಂಧ ಇಟ್ಟುಕೊಂಡಿರುವ ಪ್ರವೀಣ್ ಶೆಟ್ಟಿ ಅವರು ಎರಡು ಬಾರಿ ಬನ್ನಂಜೆಯ ಬೆದರಿಕೆ ಕರೆಯನ್ನು ಸ್ವೀಕರಿಸಿದಾಗ ಕರ್ನಾಟಕದಲ್ಲೇ ಇದ್ದರು. ಮೂರನೇ ಹಾಗೂ ಕಡೆಯ ಬೆದರಿಕೆ ಕರೆ ಬಂದಾಗ ಮಾತ್ರ ಅವರು ಇದ್ದದ್ದು ದುಬೈನಲ್ಲಿ. ಅವತ್ತು 2014ರ ಡಿಸೆಂಬರ್ 21. ಅದೇ ದಿನ ದುಬೈನಲ್ಲಿ ಬನ್ನಂಜೆ ವಿರುದ್ಧ ದೂರು ದಾಖಲಾಯಿತು. ಪ್ರವೀಣ್ ಶೆಟ್ಟಿ ಅವರು ದುಬೈನಲ್ಲಿ ದೂರು ದಾಖಲಿಸಿದರು ಎಂದು ಗೊತ್ತಾದ ಕ್ಷಣದಿಂದ ತನ್ನ ಆಟವಿನ್ನೂ ಮುಗಿಯಿತು ಎಂದೇ ತೀರ್ಮಾನಿಸಿದ್ದ ಬನ್ನಂಜೆ ಆ ಕ್ಷಣದಿಂದಲೇ ದೂರು ಹಿಂತೆಗೆದುಕೊಳ್ಳುವಂತೆ ದುಂಬಾಲು ಬಿದ್ದಿದ್ದ. ಬೇಕಾದರೆ ನಿಮಗೇ ಹಣ ಕೊಡುತ್ತೇನೆ, ಕೇಸು ಮಾತ್ರ ವಾಪಸ್ ಪಡೆಯಿರಿ ಎನ್ನುವ ಮಟ್ಟಕ್ಕೂ ಗೋಳಾಟ ಶುರು ಮಾಡಿದ್ದ ಎನ್ನುತ್ತಾರೆ ಬೆಂಗಳೂರಿನ ಅಧಿಕಾರಿಗಳು.

ಮೊದಲು ಬಂಧಿಸಿದ್ದು ಟೈಗರ್ ಅಶೋಕ್ ಕುಮಾರ್
ಉಡುಪಿಯ ಕಾಲೇಜಿನಲ್ಲಿರುವಾಗಲೇ ರೌಡಿಸಂ ಚಟುವಟಿಕೆ ಆರಂಭಿಸಿದ್ದ ರಾಜೇಂದ್ರ ಕುಮಾರ್ ಅಲಿಯಾಸ್ ಬನ್ನಂಜೆ ರಾಜ, ಉದ್ಯಮಿ ಕೊಕ್ಕರ್ಣೆ ಕುಶಲ ಶೆಟ್ಟಿ ಕೊಲೆ ಪ್ರಕರಣದ ಆರೋಪಿಯಾಗಿ ಅಪರಾಧ ಜಗತ್ತಿಗೆ ಕಾಲಿಟ್ಟಿದ್ದ. ಆಗ ರೌಡಿ ಜಗತ್ತಿನಲ್ಲಿ ಚಾಲ್ತಿಯಲ್ಲಿದ್ದ ಕಿಞಣ್ಣ ರೈ ಮೂಲಕ ಬೆಂಗಳೂರಿಗೆ ಬಂದವನು ಟ್ರಾವೆಲ್ಸ್‌ನಲ್ಲಿ ಕೆಲಸ ಮಾಡಿಕೊಂಡೇ ಕರಾವಳಿ ಮೂಲದ ರೌಡಿ ಜಗತ್ತಿನ ಬೆಳೆಸಿಕೊಂಡಿದ್ದ. ಈತನನ್ನು ಮೊದಲ ಬಾರಿಗೆ ಬಂಧಿಸಿದ್ದು ಆಗ ಜೆಜೆ ನಗರ ಇನ್ಸ್‌ಪೆಕ್ಟರ್ ಆಗಿದ್ದ ಟೈಗರ್ ಅಶೋಕ್‌ಕುಮಾರ್. ವಿಜಯನಗರ ಕಡೆಯಿಂದ ಟಾಟಾ ಎಸ್ಟೇಟ್ ಕಾರಿನಲ್ಲಿ ಹೋಗುತ್ತಿದ್ದ ಬನ್ನಂಜೆಯ ಕಾರನ್ನು ತಡೆದು ತಪಾಸಣೆ ನಡೆಸಿದಾಗ ಆತನ ಬಳಿ ಆಗಲೇ .38 ರಿವಾಲ್ವರ್ ಜತೆಗೆ 18 ಸುತ್ತು ಗುಂಡುಗಳು ಪತ್ತೆಯಾಗಿತ್ತು. ಆಗಿನ್ನೂ ಬನ್ನಂಜೆ ಹೆಸರು ಬೆಂಗಳೂರು ರೌಡಿ ಜಗತ್ತಿಗೆ ಗೊತ್ತೇ ಇರಲಿಲ್ಲ. ಆಗ ದುಬೈನಲ್ಲಿದ್ದ ಮುತ್ತಪ್ಪ ರೈ ಪರವಾಗಿ ಕೆಲಸ ಮಾಡುತ್ತಿದ್ದುದಾಗಿ ಪೊಲೀಸರಿಗೆ ಮಾಹಿತಿ ಸಿಕ್ಕಿತ್ತು. ಈ ಕೇಸಿನಲ್ಲಿ ಜಾಮೀನು ಪಡೆದು ಹೊರಗೆ ಬಂದ ಬನ್ನಂಜೆ 1996ರಲ್ಲಿ ಬನಶಂಕರಿಯ ಕದಿರೇನಹಳ್ಳಿ ಕ್ರಾಸ್‌ನಲ್ಲಿ ನಡೆದ ಶೂಟೌಟ್‌ನಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ. ತಲೆಗೆ ಬಿಳಿ ವೇಲ್ ಸುತ್ತಿಕೊಂಡು ಡಬ್ಬಲ್ ಬ್ಯಾರಲ್ ಬಂದೂಕಿನಲ್ಲಿ 6 ಸುತ್ತು ಗುಂಡು ಹಾರಿಸಿದ್ದ ಈತನಿಂದ ಶ್ರೀನಿವಾಸ್ ಎಂಬಾತನ ಹತ್ಯೆಯಾಗಿತ್ತು. ಆಗಲೂ ಈತನ ಹೆಸರು ಭೂಗತ ಲೋಕದಲ್ಲಿ ಅಷ್ಟಾಗಿ ಚಾಲ್ತಿಗೆ ಬರಲಿಲ್ಲ. ಈ ದಾಳಿ ನಡೆಯುವಾಗ ರಾಮನಗರದಲ್ಲಿದ್ದ ಬನ್ನಂಜೆ ಅಲ್ಲಿಂದ ದುಬೈಗೆ ಹಾರಿ ಮುತ್ತಪ್ಪ ರೈ ಜತೆಗೂ ಮುನಿಸಿಕೊಂಡು ಕೊರಗ ವಿಶ್ವನಾಥ ಶೆಟ್ಟಿ ಜತೆಗೆ ಸೇರಿಕೊಂಡು ಪ್ರತ್ಯೇಕ ಗ್ಯಾಂಗ್ ಕಟ್ಟಿದ.

ಬನಶಂಕರಿ ಶೂಟೌಟ್‌ನಲ್ಲಿ ಬನ್ನಂಜೆಗೆ ಕಾರಿನ ಚಾಲಕನಾಗಿದ್ದ ಬೆಳಗಾವಿ ಮೂಲದ ಬಸ್ ಡ್ರೈವರ್ ಆರೀಫ್‌ನನ್ನು ಆಗಿನ ಉಪ್ಪಾರಪೇಟೆ ಎಸಿಪಿಯಾಗಿದ್ದ ಬಾವಾ ಬಂಧಿಸಿದ್ದರು. ಮದುವೆಯಾಗಿ ಕೇವಲ ಮೂರು ದಿನಗಳಲ್ಲೇ ಪೊಲೀಸ್ ಬಲೆಗೆ ಬಿದ್ದಿದ್ದ ಆರೀಫ್ ಬನ್ನಂಜೆಯ ಎಲ್ಲಾ ಮಾಹಿತಿಗಳನ್ನೂ ಪೊಲೀಸರ ಎದುರು ಬಿಚ್ಚಿಟ್ಟಿದ್ದ. ಹೀಗಾಗಿ ಅಂದಿನಿಂದಲೇ ಬನ್ನಂಜೆ ರಾಜನ ವಿವರಗಳು ರಾಜ್ಯ ಪೊಲೀಸರ ದಾಖಲೆಗೆ ಸೇರಿದ್ದವು.

2001 ರಲ್ಲಿ ಉಪ್ಪಾರಪೇಟೆಯ ದುರ್ಗಾ ಟ್ರಾವೆಲ್ಸ್ ಉಪಾಧ್ಯಾಯ ಭಟ್ ಮೇಲೆ ಗುಂಡಿನ ದಾಳಿ ನಡೆಸಿದಾಗ ರಾಜ್ಯದ ಭೂಗತ ಜಗತ್ತಿನಲ್ಲಿ ಮೊದಲ ಬಾರಿಗೆ ಬನ್ನಂಜೆ ಹೆಸರು ದೊಡ್ಡ ಮಟ್ಟದಲ್ಲಿ ಶಬ್ದ ಮಾಡಿತು. ಈ ಸಂದರ್ಭದಲ್ಲಿ ಆತನ ಕೆಲವು ಸಹಚರರನ್ನು ರಾಜ್ಯ ಪೊಲೀಸರು ಬಂಧಿಸಿದ್ದರು. ಇಲ್ಲಿಂದ ಮುಂದಕ್ಕೆ ಉದ್ಯಮಿಗಳನ್ನು, ಲಿಕ್ಕರ್ ದೊರೆಗಳನ್ನು ಹೆದರಿಸಿ ಹಣ ವಸೂಲಿ ಆರಂಭಿಸಿದ ಈತ 2009ರಲ್ಲಿ ವಿಶ್ವನಾಥ ಶೆಟ್ಟಿ ಜತೆಗೂ ಜಗಳವಾಡಿದ್ದ. ಬಳಿಕ ವಿಶ್ವನಾಥ ಶೆಟ್ಟಿ ಗ್ಯಾಂಗ್ ಕೊಟ್ಟ ಮಾಹಿತಿಯನ್ನಾಧರಿಸಿದ ದುಬೈ ಪೊಲೀಸರು ಅಬುದಾಬಿಯಲ್ಲಿ ನಕಲಿ ಪಾಸ್‌ಪೋರ್ಟ್ ಪ್ರಕರಣದಲ್ಲಿ ಬನ್ನಂಜೆಯನ್ನು ಬಂಧಿಸಿದ್ದರು. ಕರ್ನಾಟಕ ಪೊಲೀಸರು ಅಲ್ಲಿಗೆ ತೆರಳುವಷ್ಟರಲ್ಲಿ ದುಬೈ ನ್ಯಾಯಾಲಯದಲ್ಲಿ ಜಾಮೀನು ಪಡೆದು ಅಲ್ಲಿಂದ ಮೊರಕ್ಕೊಗೆ ತೆರಳಿದ್ದ. ಆ ಸಮಯದಲ್ಲಿ ಮಂಗಳೂರು ಮೂಲದವರೇ ಆದ ದುಬೈ ಉದ್ಯಮಿಯೊಬ್ಬರು ಬನ್ನಂಜೆಗೆ ಜಾಮೀನು ನೀಡಿದ್ದರು. ಅವತ್ತಿನಿಂದ ಮತ್ತೆ ದುಬೈಗೆ ತಲೆಹಾಕದ ಬನ್ನಂಜೆ ಮೊರಕ್ಕೋದ ಅತಿ ದೊಡ್ಡ ನಗರವಾದ ಕಾಸಾ ಬ್ಲಾಂಕಾದಲ್ಲೇ ‘ಕುಮಾರ ರಾಜ ಹೇಮಂತ ಹೆಗ್ಡೆ’ ಹೆಸರಿನಲ್ಲಿ ವಾಸ್ತವ್ಯ ಹೂಡಿದ್ದ. ಆ ನೆಲದಲ್ಲಿ ಯಾವುದೇ ಅಪರಾಧ ಪ್ರಕರಣಗಳಲ್ಲಿ ಭಾಗಿಯಾಗದ ಈತ ಅಲ್ಲಿಂದಲೇ ಕರ್ನಾಟಕ, ಮುಂಬೈ ಮತ್ತು ಗೋವಾದ ಕೆಲವು ಉದ್ಯಮಿಗಳಿಗೆ ಬೆದರಿಕೆ ಹಾಕುವುದು, ಹಣ ವಸೂಲಿ ಮಾಡುವುದು ಮುಂದುವರೆಸಿದ್ದ.

ದುಬೈನ ಪ್ರಭಾವಿ ಉದ್ಯಮಿ ಪ್ರವೀಣ್ ಶೆಟ್ಟಿ ಅವರಿಗೆ ಬೆದರಿಕೆ ಹಾಕುವ ಮೂಲಕ ಒಂದು ದಶಕದ ಭೂಗತ ಓಡಾಟಕ್ಕೆ ತಡೆಬಿದ್ದಂತಾಗಿದೆ. ಇನ್ನು ಮೂರು ನಾಲ್ಕು ದಿನಗಳಲ್ಲಿ ಬನ್ನಂಜೆಯನ್ನು ಭಾರತಕ್ಕೆ ಕರೆತರಲಿರುವ ‘ರಾ’ ಅಧಿಕಾರಿಗಳು ಕರ್ನಾಟಕ ಮೂಲದ ಭೂಗತ ದೊರೆಯೊಬ್ಬನ ಅಧ್ಯಾಯಕ್ಕೆ ಕೊನೆ ಹಾಡಲಿದ್ದಾರೆ.

ವ್ಯಾಲೆಂಟೇನ್ಸ್ ಡೇ ಉಡುಗೊರೆ
ಮಣಿಪಾಲ ಸಮೀಪದ ಪರ್ಕಳದ ಸುಮಾ ಹೆಗ್ಡೆ (ಹೆಸರು ಬದಲಾಯಿಸಿದೆ) ಎನ್ನುವವರನ್ನು ಪ್ರೀತಿಸಿ ಮದುವೆಯಾಗಿದ್ದ ಬನ್ನಂಜೆಗೆ ಇಬ್ಬರು ಮಕ್ಕಳಿದ್ದಾರೆ. ಹೆಂಡತಿ ಮತ್ತು ಮಕ್ಕಳು ದುಬೈನಲ್ಲೇ ಇದ್ದಾರೆ. ಪ್ರೇಮಿಸಿ ಮದುವೆಯಾದ ಬನ್ನಂಜೆಗೆ ‘ರಾ’ ಅಧಿಕಾರಿಗಳು ಈ ಬಾರಿಯ ಪ್ರೇಮಿಗಳ ದಿನಕ್ಕೆ ಮರೆಯಲಾರದ ಉಡುಗೊರೆ ಕೊಟ್ಟಿದ್ದಾರೆ.

ಮುಖಕ್ಕೆ ಪ್ಲಾಸ್ಟಿಕ್ ಸರ್ಜರಿ
ಬನ್ನಂಜೆ 5 ವರ್ಷಗಳಲ್ಲಿ 8ಕ್ಕೂ ಹೆಚ್ಚು ಭಾರಿ ಭಾರತಕ್ಕೆ ಬಂದು ಹೋಗಿದ್ದ ಎಂಬ ಅಂಶ ಗುಪ್ತಚರ ಇಲಾಖೆ ತನಿಖೆಯಲ್ಲಿ ತಿಳಿದು ಬಂದಿದೆ. ಇದೇ ವೇಳೆ ಆತ ಫೋಟೊದಲ್ಲಿರುವಂತೆ ಇಲ್ಲ. ಪ್ಲಾಸ್ಟಿಕ್ ಸರ್ಜರಿಗೊಳಗಾಗಿ ತನ್ನ ರೂಪವನ್ನೇ ಬದಲಾಯಿಸಿಕೊಂಡಿದ್ದಾನೆ ಎಂದು ಹೇಳಲಾಗಿದೆ.

ಉ.ಕ ಜಿಲ್ಲೆಯ ಉದ್ಯಮಿಗಳಿಗೆ ನೆಮ್ಮದಿ

* ರಾಘು ಕಾಕರಮಠ ಅಂಕೋಲಾ (ಉತ್ತರ ಕನ್ನಡ)

ಬನ್ನಂಜೆ ರಾಜನ ಬಂಧನ ಜಿಲ್ಲೆಯ ಉದ್ಯಮಿಗಳಿಗೆ ಅಲ್ಪ ಮಟ್ಟಿಗೆ ನೆಮ್ಮದಿ ತಂದಿದೆ. ಹಪ್ತಾ ನೀಡುವಂತೆ ಶಾಸಕರಿಗೆ ಜೀವ ಬೆದರಿಕೆ ಹಾಕಿರುವ ಎರಡು ಪ್ರಕರಣಗಳು ಸೇರಿದಂತೆ ಜಿಲ್ಲೆಯಲ್ಲಿ ಬನ್ನಂಜೆ ರಾಜನ ವಿರುದ್ಧ 5 ಪ್ರಕರಣಗಳಿವೆ.

ಶಾಸಕರಿಗೆ ಬೆದರಿಕೆ:
ಗಣಿ ಮಾಫಿಯಾದ ಜಾಡು ಹಿಡಿದು ಉದ್ಯಮಿದಾರರಿಗೆ ಬೆದರಿಕೆ ಒಡ್ಡುತ್ತಿದ್ದ ಬನ್ನಂಜೆ ರಾಜನ ಬೆದರಿಕೆ ಕರೆಗಳಿಂದ ಉತ್ತರ ಕನ್ನಡ ಜಿಲ್ಲೆಯ ಪ್ರಭಾವಿ ಅದಿರು ಉದ್ಯಮಿಗಳ ನಡುಗಿದ್ದರು. ಮಲ್ಲಿಕಾರ್ಜುನ ಶಿಪಿಂಗ್ ಪ್ರೈ ಲಿಮಿಟೆಡ್ ಮಾಲೀಕ, ಹಾಲಿ ಕಾರವಾರ-ಅಂಕೋಲಾ ಕ್ಷೇತ್ರದ ಶಾಸಕ ಸತೀಶ ಸೈಲ್, ಡ್ರೀಮ್ ಲಾಜೆಸ್ಟಿಕ್ ಕಂಪನಿ ಮಾಲೀಕ ಹಾಲಿ ಯಲ್ಲಾಪುರ ಕ್ಷೇತ್ರದ ಶಾಸಕ ಶಿವರಾಮ ಹೆಬ್ಬಾರ ಹಲವು ಬಾರಿ ಬನ್ನಂಜೆ ರಾಜನ ಬೆದರಿಕೆ ಕರೆಗಳನ್ನು ಸ್ವೀಕರಿಸಿದ್ದರು. 2012ರಲ್ಲಿ ಸತೀಶ ಸೈಲ್ ಮನೆಯ ಮುಂದೆ ಗುಂಡಿನ ದಾಳಿ ನಡೆಸಿ, ಬಿ ಆರ್ ಎಂದು ಬರೆದಿರುವ ಚೀಟಿ ನೀಡಿ, ಬೆದರಿಕೆ ಹಾಕಿದ್ದು ತಾನೇ ಎಂದು ತಿಳಿಸಿದ್ದ.

ನಾಯಕ ಹತ್ಯೆಯ ರೂವಾರಿ:
ಬೇಲೆಕೇರಿ ಬಂದರು ಮೂಲಕ ಅದಿರು ಸಾಗಾಟ ನಡೆಸುತ್ತಿದ್ದ ಉದ್ಯಮಿ ಆರ್.ಎನ್.ನಾಯಕ ಅವರನ್ನು ಉತ್ತರ ಪ್ರದೇಶ ಹಾಗೂ ಬಿಹಾರ ಮೂಲದ ದುಷ್ಕರ್ಮಿಗಳನ್ನು ಬಳಸಿಕೊಂಡು 2013ರ ಡಿ. 21ರಂದು ಹತ್ಯೆ ಮಾಡಿಸಿದ್ದು ಬನ್ನಂಜೆ ಎಂದು ಹೇಳಲಾಗಿದೆ. ಮಾಧ್ಯಮಗಳಿಗೆ ಕರೆ ಮಾಡಿದ್ದ ರಾಜ ಈ ಹತ್ಯೆ ನಡೆಸಿದ್ದು ತಾನೇ ಎಂದು ಬಹಿರಂಗಗೊಳಿಸಿದ್ದ. ನಾಯಕ ಹತ್ಯೆಯಾಗಿ ವರ್ಷ ಗತಿಸಿದರೂ ಅವರ ಕುಟುಂಬಕ್ಕೆ ಬರುತ್ತಿದ್ದ ಬೆದರಿಕೆ ಕರೆ ನಿಂತಿರಲಿಲ್ಲ. ಬನ್ನಂಜೆಯಿಂದ ರಕ್ಷಣೆ ಕೋರಿ ಅಂಕೋಲಾ ಠಾಣೆಯಲ್ಲಿ ಪ್ರಕರಣವೂ ದಾಖಲಾಗಿದೆ.

(~ ವಿ.ಕ | * ಗಿರೀಶ್‌ಕೋಟೆ ಬೆಂಗಳೂರು)

ಈ ವರದಿಯ ಬಗ್ಗೆ ನಿಮ್ಮ ಅನಿಸಿಕೆ ತಿಳಿಸಿ.
ಶಭಾಷ್ (0) ಸಮ್ಮತ (0) ಅಸಮ್ಮತ (0) ಖಂಡಿಸುವೆ (0) ಅಭಿಪ್ರಾಯವಿಲ್ಲ (0)